Буряад Уласай Арадай Хуралай Ниигэмэй бодолгын талаар хорооной һунгамалнууд түрүүлэгшэ Игорь Марковецэй ударидалга доро Захааминай аймагай Баян-Гол тосхоной эмнэлгын амбулатори хүрэбэ. Нёдондо жэл «Хүдөө дэбисхэрнүүдые олон талаһаа хүгжөөлгэ» гэһэн Оросой Холбооной гүрэнэй хүтэлбэриин ёһоор барилгын, хабсаргалтын хүдэлмэринүүд эндэ үнгэргэгдэһэн байгаа. Тиигэжэ шала шэнээр хушагдаһан, ханын модонууд һэлгэгдэһэн, бетон шудхажа бүтээхэ ажалнууд хэгдээ, шэнэ плитка дэлгэгдээ гэжэ Хуралай түлөөлэгшэдтэ хөөрэжэ харуулбад.
- Баян-Голой эмнэлгын амбулатори мүнөө «хоёрдохи түрэлдөө» хүдэлжэ байна. Досоо, газаагүй шэнэлэгдээ. Хуушанай модон сонхонуудай орондо шэнэ, пластиково сонхонууд табигдаа. Таһалгануудай үүдэнүүд, дулаасуулдаг түхеэрэлгэнүүд һэлгэгдээ, шэнэ радиаторнууд табигдаа, - гэжэ терапевт эмшэн Александр Баиров хөөрэнэ.
Эмнэлгын энэ амбулатори Баян-Гол тосхонһоо гадна дүтэ шадарай Борто, Ехэ-Сахир, Мэлэ, Сагаан-Морин тосхонуудые хангадаг юм.
- 1950-дахи онуудаар баригдаһан эмнэлгын байшан мүнөө хүрэтэр капитальнаар заһабарилагдаагүй байгаа. Мүнөөл айхабтар, гайхамшаг гоё ажал хэгдэбэ даа. Заһабарилагдаһан таһалганууд соогуур терапевтын, ехэ зониие болон хүүгэдые тарилгын, эдеэнэй, хубсаһа хадагалха газарнууд, газаалха, тэрэ тоодо аһамаг хүнүүдэй, газарнууд түбхинэбэ гээшэ. Шүдэ аргалдаг эмшэнэй кабинет, үдэрэй туршада хэбтэжэ аргалуулха таһалга, үбшэнтэниие, эхэнэрнүүдые хүлеэжэ үзэхэ таһалганууд, эмэй һан бии болохо, - гэжэ эндэхи эмнэлгын хүдэлмэрилэгшэд тэмдэглэнэ.
Баян-Голой эмнэлгын амбулаторидо Сэрэгэй тусхай ябуулгада хабаадагшадай эмнэлгын хойшолон хинажа байха түб нээхэ тухай асуудалтай арадай һунгамалнуудта хандабад.
Һунгамалнуудай ошожо хараха үшөө нэгэ газар – аймагай түбэй эмнэлгын газар байба. Мүнөө эндэ заһабариин ажалнууд ябуулагдажа байна. Ахамад эмшэн Константин Эрдынеевэй хэлэһээр, эмнэлгы байшанай нэгэдэхи дабхар бүхыдөө хүн зониие угтажа, бүхы талаһаань шэнжэлгэ хэжэ элирүүлгын таһаг болохо юм ха.
- Үбшэнтэдые угтажа абадаг газар рентген-кабинедтэ дүтэ абаашагдаха, тэрэ дороо рентген-зурагуудые абаха, үбшэнүүдые ультразвугээр таниха арганууд гар доро байха болоно. Эмнэлгын байшан заһабарилгада 49 сая түхэриг һомологдоһон юм. 2-дохи, 3-дахи дабхарнуудые заһабарилхын тула 32 000 000 түхэриг хэрэгтэй. Тэрэл 2-дохи, 3-дахи дабхарнуудай дулаасуулгын түхеэрэлгэнүүдые заһабарилгада, эмнэлгэдэ хабаатай хиидэ 11 000 000 гаран түхэриг хэрэгтэй, - гэжэ Константин Эрдынеев хэлэбэ.
Амагай түбэй эмнэлгын газарай капитальна заһабарилгануудые дүүргэхын тула мүнгэ нэмэжэ һомолхо тухай асуудал һунгамалнуудай урда табигдаба.
- Аймагай эмнэлгын байшан 20 гаран жэлнүүдэй туршада заһабарилагдаагүй, дары түргэн хэмжээ абахаар саг тулажа ерээ. Байшан болон түхеэрэлгэнүүдые шэнэлэлгэ үбшэнтэнөө саашадаа хэдэн олон жэлнүүд соо зохид байдалаар хангахын тула, ашатай, туһатай эмнэлгын тула хэгдэнэ гээшэ. Хүнүүд зохид газарта мэргэжэлтэ туһа хангамжа абаха ёһотой, энээнэйл түлөө заһабарилгын ажалнууд хэгдэнэ ха юм даа, эмнэлгын хэрэгсэлнүүдые, унаа шэнэлхэ хэрэгтэй. Энэ талаар манай уласта хэдэн шэглэлээр ажалнууд ябуулагдажа байна. Тэрэ тоодо бүхы эмнэлгын албанай эхин шатада байһан газарнуудые үргэхэ, дэмжэхэ талаар, - гэжэ Арадай Хуралай Ниигэмэй бодолгын талаар хорооной түрүүлэгшэ Игорь Марковец хэлэбэ.
Эмнэлгэдэ хабаата олон асуудалнууд – үбшэнтэниие угтажа абалга, туһа хангалга үзүүлэлгын шанартай һайн, бултанда хүртэсэтэй байха талаар асуудалнууд Буряад Уласай Арадай Хуралай анхарал доро үргэлжэ байдаг гэжэ тэмдэглэхэ шухала.
Эндэ ябаһан ажалай бүлэгэй бүхы дурадхалнууд Арадай Хуралай «Буряад Уласай ажаһуугшадай элүүрые хамгаалгын талаар зарим асуудалнууд» гэһэн үбшэнтэниие хэбтүүлжэ эмшэлхэ болон адаглаха сэдэбээр түхэреэн шэрээдэ зүбшэгдэхэ.
